18 ఏళ్ల తర్వాత మమ్ముట్టి, మోహన్ లాల్.. ఓటీటీలో పొలిటికల్ థ్రిల్లర్ 'పేట్రియాట్'

మలయాళ సినీ దిగ్గజాలు మమ్ముట్టి, మోహన్ లాల్ 18 ఏళ్ల సుదీర్ఘ విరామం తర్వాత మళ్లీ కలిసి నటించారు. వీరు ప్రధాన పాత్రలు పోషించిన పొలిటికల్ థ్రిల్లర్ 'పేట్రియాట్'. ఈ చిత్రాన్ని ప్రముఖ దర్శకుడు మహేష్ నారాయణన్ తెరకెక్కించారు. జూన్ 5 నుంచి ప్రముఖ ఓటీటీ ప్లాట్‌ఫామ్ జీ5లో ఈ సినిమా స్ట్రీమింగ్ కానుంది. మలయాళంతో పాటు తెలుగు, హిందీ, తమిళం, కన్నడ భాషల్లోనూ ఇది అందుబాటులో ఉండనుంది.

దేశ భద్రత కోసం ఓ అత్యాధునిక నిఘా వ్యవస్థను రూపొందించిన వ్యక్తి, అదే వ్యవస్థను అడ్డం పెట్టుకుని కొందరు అమాయకులను బ్లాక్‌మెయిల్ చేస్తుండటాన్ని గుర్తిస్తాడు. దీంతో తను సృష్టించిన వ్యవస్థకే ఎదురు తిరుగుతాడు. ఈ క్రమంలో దేశభక్తి, దేశద్రోహం మధ్య ఉండే సన్నని గీతపై అతను చేసే పోరాటమే ఈ చిత్ర కథాంశం. గూఢచర్యం, రాజకీయాలు, టెక్నాలజీ, భావోద్వేగాలను కలగలిపి ఈ చిత్రాన్ని రూపొందించారు.

మమ్ముట్టి, మోహన్ లాల్‌తో పాటు నయనతార, ఫహాద్ ఫాజిల్, కున్‌చాకో బొబన్ వంటి భారీ తారాగణం ఈ సినిమాలో నటించడం విశేషం. రేవతి, రాజీవ్ మీనన్ తదితరులు ఇతర కీలక పాత్రల్లో కనిపించనున్నారు. ఈ సినిమాపై దర్శకుడు మహేష్ నారాయణన్ మాట్లాడుతూ, "ప్రజలను రక్షించాల్సిన టెక్నాలజీనే వారిని భయపెట్టే ఆయుధంగా మారితే ఎలా ఉంటుందనే ఆలోచనతో ఈ కథ రాశాం" అని తెలిపారు.

మమ్ముట్టి మాట్లాడుతూ, "ఇది కేవలం పొలిటికల్ థ్రిల్లర్ మాత్రమే కాదు, మనస్సాక్షి, బాధ్యత గురించి చెప్పే బలమైన కథ" అన్నారు. ఇక, చాలా ఏళ్ల తర్వాత మమ్ముట్టితో కలిసి నటించడం ప్రత్యేక అనుభూతినిచ్చిందని మోహన్ లాల్ పేర్కొన్నారు. "నిజం, అధికారం మధ్య జరిగే సంఘర్షణే ఈ సినిమా" అని ఆయన వివరించారు. ఉత్కంఠభరితమైన కథనంతో, ఆలోచింపజేసే అంశాలతో 'పేట్రియాట్' ప్రేక్షకులను ఆకట్టుకుంటుందని చిత్రబృందం విశ్వాసం వ్యక్తం చేస్తోంది.